LAOAG CITY – Kinumpirmaran ti National Police Commission (NAPOLCOM) a silulukat ti opisina da a mangawat kadagiti affidavits a naawat ti opisina ti Criminal Investigation and Detection Group (CIDG) idi Hulyo ita a tawen.
Daytoy ket kalpasan a nasaludsud no adda ti naamoan ti komisyon mainaig kadagiti nasao a ready-made documents nga insumitir ti 10 nga indibidual a maipagarop nga adda ti ammo na iti kaso dagiti mapukpukaw a mammallot.
Inbatad ni National Police Commission Commissioner Vice Chairperson and Executive Officer Atty. Rafael Vicente Calinisan, awan ti naawat na nga impormasyon ken awan pay ti ammo na seknan kadagiti madakdakamat a dokumento.
Inlawlawag na a sabali ti trabaho ti Department of Justice (DOJ) iti trabaho ti oposina da isut gapuna a no dagiti affidavit ket adda ti pakainaigan ti pulis ket mabalin da nga idatag iti opisina da.
Nagtalinaed met ti takder ni Calinisan a kitaen amin ti opisina dagiti rumbeng a maibestigar mainaig iti pannakairaman dagiti 12 a pulis iti kaso dagiti mapukpukaw a mammallot.
Immunan nga inrakurak ni Calinisan a dagiti pulis a maibagbaga nga adda ti pakainaigan na iti panagpukaw dagiti mammallot ket maipaayan ti due process ken nakasagana ti komisyon a dumngeg kadagiti palawag da iti nasao a kaso.
