LAOAG CITY – Nagtalinaed paylaeng iti pasilidad ti Philippine National Police (PNP) iti Camp Crame ti agtawen ti 81 a ni dati a Department of Public Works and Highways (DPWH) Secretary Manuel “Manny” Bonoan iti baet ti inparuk-at a pammilin ti Sandiganbayan para iti pannakawaya-waya na.
Segun ken ni PNP Spokesperson Police Col. Allen Rae Co, saan a dagus a naipatungpal ti pannakawaya-waya ti dati a sekretaryo gapu ta kasapulan paylaeng a maberipikar ti Criminal Investigation and Detection Group (CIDG) no adda pay ti sabali a nakapenpen a kaso na, aktibo a warrant of arrest wenno dadduma pay a legal a rason tapno agtalinaed iti kustodiyar da.
Inpetteng ni Co a ti nasao a proseso ket paset ti pagannurutaan a due diligence ti nailian a pulisya tapno masiguraado nga awan ti aniaman a legal a lapped sakbay naan-anay a maway-wayaan ti maysa a nakabalud.
Inlawlawag pay ni Co a nairanan a nakaserran ti opisina ti Sandiganbayan isut gapuna a saanen nga immabot ti proseso ken pannakikoordinar kadagiti kasapulan a dokumento ken beripikasyon iti nasao nga aldaw.
Gapu iti daytoy, namnamaen a maiproseso ken maipatungpal ti pormal a pannakawayawaya iti dati nga opisyal ita nga aldaw ti biernes, Setyembre 4, 2026.
