LAOAG CITY – Inlawlawag ni Barangay Kagawad Arlene Ramelb ti Barangay 3 Nuestra Señora del Rosario ditoy siudad ti Laoag maipanggep iti arungaing dagiti sumagmamano a residente iti nasao a barangay a saan a makapagna iti right of way gapu iti maipagarup a nakaabbeng a construction materials iti dalan.
Segun kenkuana, saan a basura ti nakaabbeng iti kalsada no diket ti nakabunton a darat ken landok a mausar para iti panangpalitada ti alad ti ipagna.
Inbatadna a makapagna dagiti indibidual ken makadalyasat dagiti motorista gapu ta nalawa met pay laeng ti nakaikabilan dagiti construction materials.
Kunana nga iyur-urayda pay laeng dagiti agtrabaho para iti panangpalitada ti alad ti ipagna gapu ta saan pay a masango dagitoy.
Inpettengna a kalikagumda iti panangpalitada ti alad ti ipagna gapu ta no adda ti napigsa a tudo ket malayosda nangruna ket awan ti pagtarayan ti danum iti lugarda.
Mainaig iti daytoy, inpakaammona a saan met pay unay a nabayag dagiti construction materials a naikabil iti dalan ngem inpasingkedna nga apaman nga addanton dagiti trabahador ket insigida a mailippas iti panangpalitada ti alad.
Kabayatanna, nagkiddaw ni Barangay Kagawad Ramelb iti naan-anay a pannakaawat kadagiti maseknan a residente gapu ta ar-aramidenda ti amin tapno mailippas iti panangpalitada ti alad iti kabiitan a panawen.
Immuna iti daytoy, nakaawat ti Bombo Radyo ti reklamo mainaig iti maipagarup a nakabunton a basura iti right of way ti maysa a dalan iti Barangay 3 Nuestra Señora del Rosario ditoy siudad ti Laoag ngem bayat iti panagturong ti News Team ket ditoy a naimatangan a saan a basura no diket dagiti construction materials.
