LAOAG CITY – Nagballaag ti Department of Social Welfare and Development kadagiti benepisiario ti tulong pinansial a saan nga usaren ti cash aid iti panagsugal.
Inbilin ni Department of Social Welfare and Development Secretary Rex Gatchalian nga amin a mangipatpatungpal ti programa a palagipan dagiti benepisiario a ti ayuda ket naikeddeng laeng para kadagiti kangrunaan a kasapulan.
Inbatadna a masapul ti naig-iget a panangmonitor kalpasan ti pannakaipaay kadagiti ayuda ken ti alisto a tignay kadagiti reklamo ti saan nga husto a pannakausar kadagitoy.
Naammoan a no mapaneknekan nga us-usaren ti ayuda iti panagsugal ket mabalin nga ikkaten iti programa ken maikkatan ti karebbengan a makaawat ti tulong manipud iti gobierno iti masangoanan.
Daytoy nga addang ket paset ti naig-iget a kampania ti administrasion Marcos kontra kadagiti dakes nga epekto ti panagsugal kadagiti pamilia a Pilipino.
Maipalagip nga inmandar ti Bangko Sentral ng Pilipinas kadagiti e-wallet platform a putuden ti koneksion kadagiti online gambling sites tapno maliklikan ti risgo kadagiti urnong dagiti agus-usar..
Ginutigot ti Department of Social Welfare and Development dagiti amin a benepisiario nga usaren iti husto ti tulong ti gobierno para iti pannakapasayaat ti pamiliada.
