LAOAG CITY – Nagballigi dagiti otoridad a nangarestar iti tallo a wanted person iti nagduduma nga ili ditoy probinsya.
Umuna a naarestar ket ti maysa a wanted person iti ili ti Pasuquin a daytoy ket agtawen ti 52, naasawaan, market vendor ken taga Barangay 32-C, Lapaz ditoy ciudad ti Laoag.
Naarestar ti akusado babaen ti bileg ti warrant of arrest gapu iti kaso na nga homicide ken narekomendaran ti 40 a ribo a pisos para iti pannakawaya-waya na.
Maikadwa ket ti pannakaarestar iti ili ti Adams ti maysa a fish vendor, agtawen ti 26, taga Cagayan.
Ti akusado ket naarestar babaen ti bileg ti maysa a warrant of arrest gapu iti kaso a qualified theft.
Nairekomendar ti 40 a ribo a pisos para iti pannakawaya-waya na.
Maikatlo a naarestar ket ti agtawen ti 49 a residente iti Barangay 20, Paratong iti ili ti Paoay.
Naarestar ti akusado babaen ti warrant of arrest nga inparuk-at ti Regional Trial Court Branch 17 ditoy ciudad ti Laoag gapu iti kaso a panaglabsing ti Republic Act 10591 wenno ti Comprehensive Firearms and Ammunition Regulation Act
Umabot met iti 80 ribo a pisos ti nairekomendar a pagpiyansa ti nasao nga akusado.
Iti agdama, nagtalinaed dagiti akusado kadagiti municipal police station a nakaarestaran da ken manamnama a maipresentar da iti naggapwan ti warrant of arrest a naiserbi kadakuada.
