LAOAG CITY – Nagballaag ni Senador Sherwin Gatchalian nga i-zero budget dagiti flood control projects no saan nga iyurnos ti Department of Public Works and Highways ti sistema kadagiti proyekto.
Daytoy ti inpasigurado ni Gatchalian iti baet dagiti maanomalya a proyekto para iti flood control and mitigation a naduktalan kadagiti sumagmamano a lugar ditoy pagilian.
Inbatadna a saan nga ipalubos ti Senado nga ikkan ti pundo ti proyekto no saan a maiplastar ti Department of Public Works and Highways ti ahensiada.
Inlawlawagna nga ipa-review-na ti proseso dagiti flood control projects gapu ta no agtalinaed a nalukay ket sigurado nga adda latta dagiti contractors ken sindikato ti mangabuso kadagitoy.
Kalikagum ti Senador a paigetan ti bidding process kadagiti infrastructure projects ken inpettengna iti panagusar ti baro a teknolohia gapu ta iti agdama ket mano-mano ti ar-aramidenda a bidding.
Innayonna a babaen iti daytoy a wagas ket maliklikan ti human intervention nga agbalbalin a rason no apay a mangitunda ti ghost flood control project.
