LAOAG CITY – Inpasigurado ni Philippine National Police Officer-in-Charge PLt. Gen. Melencio Nartatez Jr. a dumalan iti umiso a proseso ti reshuffle kadagiti opisial ti nailian a pulisia.
Segun ken ni Nartatez, uray isunan ti temporario a mangidadaulo ti Philippine National Police ket inpettengna a nasken a suroten dagiti umiso a pagannurotan tapno masigurado nga awan ti malablabsing iti pagalagadan iti pannakadutok kadagiti opisial.
Inbatadna a no adda ti pannakabalbaliw iti puesto dagiti opisial ken rumbeng a nakasaganada gapu ta awan ti permanente iti trabahoda gapu ta prerogative ti Presidente iti posisionda.
Maipalagip a saan a sinurot ni Philippine National Police Chief PGen. Nicolas Torre III ti rekomendasion ti National Police Commission (NAPOLCOM) mainaig iti inpatungpalna a reshuffle idi Agosto 14 no sadinno a kalikagumna nga agsubli kas number 2 man wenno Chief of Administration ni Nartatez kasukat ni PLt. Gen. Bernard Banac manipud iti Area Police Command – Western Mindanao.
Kagiddan iti daytoy, inlawlawag ni Nartatez a naurnos ti panagkaduada ken ni Torre uray inyakarna daytoy idiay Mindanao.
