LAOAG CITY – Napagtutulagan iti Sangguniang Panlalawigan a maikkan paylaeng ti maysa a milyon a pisos nga inisyal a pondo ti free transportation program para kadagiti diabetic ken cancer patients ditoy probinsia.
Daytoy ket tapno dagus a maiyimplementar ita a tawen ken magundawayan dagiti maseknan nga indibidual.
Inbatad ni Vice Governor Matthew Marcos-Manotoc a no ania ti pagkurangan na ti pondo ket mabalinda danto met ti agnayon gapu ta ti maysa a milyon a pisos ket pangrugyan laeng.
Mainaig iti daytoy, kuna ti bise gobernador a masapol a mangipasa da ti supplemental Annual Investment Program gapu ta saanda a mabalin a pondoan ti programa no saan a karaman daytoy iti Annual Investment Program.
Inlawlawag met ni Bokal Hanson Chua, ti sponsor ti nasao a programa a kalpasan a maala da dagiti impormasyon no mano amin dagiti pasyente ken no kasano ti koordinasyon dagiti nagduduma nga ili ket mabalin da maamoan ti eksakto a budget a mausar.
Kuna ni Chua nga adda dagiti 5 nga ili kas iti Piddig, Dingras, Currimao, Pinili, Paoay ken iti ciudad ti Batac nga adda ti bukod na a programa seknan iti daytoy ti agkalikagom a makikammayet iti probinsia nangruna iti Metro Ilocos Norte Council tapnu ad-adda pay a mapapintas ti nasao a programa.
