LAOAG CITY – Ibilang ti White House a ti napasamak a pammaltog iti Annunciation Catholic School idiay Minneapolis ket maysa a klase ti ‘hate crime.’
Inbatad ni White House press secretary Karoline Leavitt a basar iti imbestigasion ti Federal Bureau of Investigation, tinarget ti agtawen ti 23 a suspek a ni Robin Westman dagiti Katoliko.
Daytoy ket maibasar iti nagbalin a rakurak kadagiti naala a manifesto ti suspek iti social media account-na.
Dumanon iti 18 nga indibidual ti nasugatan no sadinno a 15 ditoy ket dagiti ubbing nga agtawen ti innem agingga iti 15 idinto a tallo ti addan iti umno a tawen.
Maipalagip a dua a biktima ti pimmusay nga agtawen ti walo ken 10 idinto a kaaduan kadagiti biktima ket nakaruaren iti ospital.
Kabayatanna, gapu iti insidente ket inbilin ni Minnesota Governor Tim Walz ti pannakai-deploy ti kapulisan kadagiti pagadalan tapno saanen a maulit dagiti pammaltog.
