LAOAG CITY – Inpakammo ni Ms. Mylene Pascual, ti mangidadaulo ti City Environment and Natural Resources Office (CENRO) ditoy ciudad ti Laoag nga adda pay laeng iti testing stage ti high thermal decomposition pyrolysis equipment.
Ti high thermal decomposition pyrolysis equipment ket addaan ti conveyor, heating chamber reactors no sadinno dagiti residual waste ken dagiti infectious waste ket isu ti maikabil.
Segun kenni Pascual, babaen iti daytoy a makitna ket agbalin laengen nga uppat a kilo kas dapo ti 100 a kilo ti basura ken ti dapo ket ma-purify.
Malaksid iti daytoy, addaan pay ti makita ti heating chamber, reactor, dry and wet scrubber isut gapo na a saan a makaitunda ti polusyon ken nabangsit nga angot.
Inbatad na a nagatang ti thermal decomposition pyrolysis equipment babaen met laeng iti panangasistir ken rekomendasyon ti Department of Science and Technology (DOST).
Mainaig iti daytoy, kunana a babaen iti nasao nga equipment ket maliklikan ti pannakaipalawa manen ti sanitary landfill nangruna ket umad-ado ti basbasura ditoy ciudad ti Laoag gapo kadagiti manamnama a maipatakder a pasdek.
Kabayatanna, inpetteng ni Pascual a masapol latta a pagsisinaen dagiti residente ti basura na a kas iti maar-aramid iti agdama kas nakaiyataday iti Republic Act 9003.
