LAOAG CITY – Inpakaammo ti Department of Budget and Management (DBM) a ti Philippine Health Insurance Corp. (PhilHealth) ti makaawat ti kadakkelan a subsidiya sa dagiti government-owned and controlled corporations (GOCC) intono 2026.
Segun kenni Budget Assistant Secretary Mary Anne dela Vega, kalpasan a nakanselar ti subsidiya ti state health insurer iti napalabas a tawen ket inlungalong ti Ehekutibo ti pannakaisubli ti pondo para iti PhilHealth nga umabot iti ₱53.26 bilyon iti pondo ti Pilipinas para iti 2026.
Inbatad na a ti nasao a kantidad ket para iti tinawen nga insurance premiums dagiti benepisyaryo pakairamanan ti indigent sector.
Maikadua met ti National Irrigation Administration (NIA) a makaawat ti ₱45.07 bilyon, ngem daytoy ket 35% ti naikkat manipud iti ₱69.37 bilyon a subsidiya iti napalabas a tawen.
Kabayatanna, 22.7% met ti pagbaban ti subsidiya ti National Food Authority (NFA), manipud iti ₱14.45 bilyon ket agbalin a ₱11.2 bilyon laengen inton 2026.
Agtalinaed met ti balor ti subsidiya ti Power Sector Assets and Liabilities Management Corp. (PSALM) iti ₱8 bilyon ken Philippine Crop Insurance Corp. (PCIC) a ₱4.5 bilyon.
Para met iti sektor ti salun-at, nailungalong ti nayon a ₱107 milyon para iti Philippine Heart Center wenno 4.6% ti nagngatoan na.
Iti pakabuklan, umabot iti ₱2.4 bilyon ti pondo ti ospital, ken nairaman daytoyiti specialty hospitals nga addaan ti nangato nga alokasyon para iti 2026.
