LAOAG CITY –Nagpannawagan ni Mr. Danver Dela Cruz, iti Chairman in Rice and Other Food Staples iti Ilocos Norte Provincial Agriculture Council iti pannakaisubli ti mandato ti National Food Authority (NFA) ken pannakaipangato ti presio ti live weight ti baboy ditoy probinsia.
Inlawlawagna a ti nasao a mandato ket ti panaggatang ti National Food Authority (NFA) kadagiti produktoda nga irik tapno ilako ti intero a pagilian tapno iti kasta ket adda ti maymaysa a presio-da a maiyataday iti nagastos da nga agtalon.
Kunana a kakaasida gapu ta nalaka dagiti panaggatang dagiti middlemen iti produktoda no sadinno a no ilakon dagiti nasao a middlemen ket nanginan ton.
Daytoy ti gapo na a kunana a kakaasida gapu ta awan ti mapastrekda a maganansia ken kurang pay para iti nagastosda ti panagtalonda.
Segun kenkuana, ad-adda nga ammo ti gobierno ti umno a presio ti bagas ngem dagiti middlemen. Kunana a ti presio ita ket P27 iti kada kilo ngem no kaado ti produksion ket mabalin pay a bumaba.
Malaksid iti daytoy, nagpnnawagan pay a ngumato kuma ti presio ti live weight ti baboy gapu ta iti agdama ket adda laeng ti P150 a presio iti kada kilo.
Inpetteng na nga awan ti hustisia para kadakuada nga agtartaraken gapu ta nangina ti agtaraken ti baboy.
Kunana a nangina dagiti feeds, agas, padananom, ken dagiti dadduma pay a kasapulan ti panagtaraken.
Daytoy ti ikkis dagiti agtartaraken gapu ta bassit laeng ti mapaspastrekan da.
Innayonna nga ikarkarigatanda laeng ti agtalon ken agtaraken tapno maipaay ti inaldaw-aldaw a pagksapulanda ti panagbiag kangrunaan ti pamiliada.
