LAOAG CITY – Naiget a naglikudan ni Ako Bicol party-list Representative Zaldy Co dagiti alegasion kenkuana ni Baguio City Mayor Benjamin Magalong mainaig iti maipagarup a maanomalya a flood control projects.
Inbatad ni Co nga awan ti nalawag a detalye dagiti pammabasol kenkuana ni Magalong.
Kwinestionaranna ti panagbalin a patas ni Magalong no daytoy ket iraman iti buklen nga independent commission a mangimbestigar iti isyu.
Inpettengna a saan nga agbalin a nainkalintegan ti imbestigasion no ti maysa a miembro ti komisyon ket mangiruruaren kadagiti akusasion iti media sakbay pay daytoy a nangrugi.
Immunan nga inbutaktak ni Magalong nga adda pay ti nangatngato nga opisial ngem ni Co ti karaman kadagiti maanomalya a flood control projects.
Binabalaw met ti Volunteers Against Crime and Corruption (VACC) dagiti mapaspasamak nga imbestigasion iti Kongreso a kuna ni Volunteers Against Crime and Corruption President Arsenio ‘Boy’ Evangelista, political agenda laeng ti mapaspasamak ken panangallilaw iti publiko.
Kabayatanna, inlawlawag ti kontrobersial a kontratista a ni Pacifico ”Curlee” Discaya nga awan ti direkta a transaksionna ken ni Co wenno ni Speaker Martin Romualdez uray madakdakamat dagiti naganda kadagiti sumagmamano nga opisial ti Department of Public Works and Highways ken pulitiko.
