LAOAG CITY – Umabot iti 14 a tattao ti natay gapu iti maibilang kas kagrabean a layos idiay Bali, Indonesia iti uneg ti agarop maysa a dekada.
Napasamak ti layos kalpasan ti sumagmamano nga aldaw a pinagtudtudo na ti napigsa iti nadakamat a lugar.
Naamoan a nagsardengen ti tudo ken in-inot metteng ti panages-esna ngem agtultuloy paylaeng ti panagbiruk dagiti rescuers kadagiti possible a survivor kalpasan nga adda dagiti naireport a mapukpukaw.
Maipalagip a sipud idi martes ket ginasut a tattao dagiti naibakwit kalpasan a natinep ti danom dagiti babbalay da.
Mainaig iti daytoy, napaserraan pay dagiti kangrunaan a kalsada iti lugar kalpasan dagiti napasamak a landslides ken nadadael ti ua a rangtay.
Gapu iti napasamak ket indeklarar ti provincial government ti week-long state of emergency.
Kabayatanna, inpeksa ni Indonesian President Prabowo Subianto ti pannakipagladingit na kadagiti napukawan ti ipatpategna iti biag gapu iti nakaro a layos a napasaran ti Bali.
Inbilin na metten kadagiti maseknan nga ahensya ti gobierno ti alisto a panangipaay da ti tulong kadagiti naapektaran ti layos.
