LAOAG CITY – Naisayangkat ti Kadiwa Handog ng Pangulo iti sangoanan ti Kapitolio Probinsial kagiddan ti panagkasangay ni Presidente Ferdinand Marcos Jr. ita nga aldaw.
Segun ken ni Engr. Ma. Teresa Bacnat, Officer In Charge ti Provincial Agriculture Office, maidiaya ti 20 a pisos a presio iti kada kilo ti bagas.
Inbatadna a mabalin ti asinoman nga interesado ti gumatang.
Nupay kasta, inlawlawagna a 10 a kilo laeng ti maipalubos a gatangen ti tunggal maysa nga indibidual.
Kunana a babaen iti daytoy ket ad-adu nga umili ti maikkan ti gundaway a makagatang iti nalaka a presio ti bagas.
Mainaig iti daytoy, inyawis ni Bacnat kadagiti kakailian ti pananggundawayda iti daytoy a pannakaidiaya ti nalaka a presio ti bagas ditoy probinsia.
Inpakaammo met ni Engr. Jonathan Corpuz, Branch Manager ti National Food Authority – Ilocos Norte Branch nga adda ti 300 a sako ti bagas ti nakasagana a mailako kas paset ti pannakaisayangkat ti Handog ng Pangulo Serbisyong Sapat Para Sa Lahat.
Kabayatanna, inrakurak ni Deparment of Social Welfare and Development Assistant Secretary Irene Dumlao nga adda ti uppat a ribu a family food packs ti naipaay kadagiti pamilia a naapektaran kadagiti naglabas a bagyo ditoy probinsia pakairamanan ti maysa a ribu a family food packs a naibunong kadagiti nagatendar iti programada.
