LAOAG CITY – Mangiwayat ti sumagmamano a grupo ken organisasion iti rehion uno ti tignay protesta inton Septiembre 21 wenno iti maika-53 a tawen sipod naideklarar ti Martial Law ditoy Pilipinas.
Segun ken ni Mr. Niño Oconer, Secretary General ti La Union Peace and Justice Advocates, panawenen tapno denggen ti gobierno ti ikkis dagiti naruay a Pilipino gapu iti kumarkaro a korapsion ditoy pagilian.
Inbatadna a ti gagem iti panangiwayatda ti tignay protesta ket tapno mangipadanon ti mensahe a saan ketdi tapno mangriribuk.
Inlawlawagna a babaen iti daytoy a wagas ket maipeksa ti sakit ti nakem, pungtot ken marikrikna dagiti umili mainaig iti panagtakaw iti kuarta ti gobierno.
Inpettengna nga aniaman ti mapasamak ket saan pulos a a mangbukel ti riribuk ti grupo wenno organision a nagatendar iti tignay protesta.
Mainaig iti daytoy, saanen a nakigtot ni Oconer ti panangipatungpal ti Philippine National Police ti No Permit, No Rally kadagiti agiwaywayat ti tignay protesta.
Nasakit ti nakemna iti nailian a pulisia gapu ta ti lugar a pangikabkabilanda kadakuada ket ti lugar nga arig awan ti makakita wenno makangngeg a tattao kadagiti iwaywayatda a tignay protesta.
Innayonna a saan a mabalin nga agpatingga laeng iti imbestigasion ti Kongreso wenno Senado gapu ta kasapulan ti tignay dagiti Pilipino kangrunaanna ket kuarta dagiti umili ti mapagsasaritaan iti daytoy.
Kabayatanna, naammoan a manamnama a pakaiwayatan ti tignay protesta ket idiay San Fernando City, La Union, Vigan City, Ilocos Sur ken ditoy Laoag City, Ilocos Norte.
