LAOAG CITY – Nadutukan ni dati a Supreme Court chief justice Sushila Karki kas interim prime minister iti Nepal kalpasan ti nadara nga anti-corruption protests a nakapadisian ti dati a gobierno.
Ti agtawen ti 73 a nagsapata iti ababa laeng a seremonya ti kaunaan a babai a a mangidaulo iti napanglaw nga Himalayan nation kalpasan ti maysa a katulugan iti nagbaetan da kadagiti protest leaders.
Maipalagip nga umabot iti 50 a tattao ti natay kadagiti napasamak nga engkwentro iti nagbaetan dagiti protesters ken otoridad no sadinno a rimsua daytoy kalpasan ti pannakai-ban ti social media platforms iti nadakamat a pagilian.
Gapu iti nakaro a pungtot dagiti protesters ket pinuuran da ti parliamento ken dagiti government buildings iti ciudad ti Kathmandu a kabisera ti Nepal a nakapwersaan ni Prime Minister KP Sharma Oli a bimmaba iti pwesto.
Kabayatanna, manamnama a mangdutuk ni Karki kadagiti ministers ti gabinete na kadagiti sumarsaruno nga aldaw.
Ni Karki ket addaan ti nadalus nga imagen ken ti liderato na iti interim government ket supsuportaran dagiti student leaders manipod iti maaw-awagan ti “Gen Z” movement.
