LAOAG CITY – Inikkat ni Presidente Ramchandra Paudel ti Nepal ti parliamento ken nangikeddeng ti baro nga eleksion inton Marso 5, 2026.
Ti desision ket naaramid kalpasan ti maysa a lawas a riribuk a nagtennag iti pannakadutok ti kaunaan a babai a Prime Minister ti nasao a pagilian.
Basar iti rakurak ti opisina ni Paudel, inbilinna a temporario a mangidaulo ni dati a Chief Justice Sushila Karki.
Nadutokan daytoy kalpasan ti nakaro a tignay protesta nga indauloan dagiti agtutubo kangrunaanna dagiti “Gen Z,” a nangkontra iti maanomalya iti gobierno.
Napilitan a nagikkat ni dati a Prime Minister K.P. Sharma Oli kalpasan a kimmaro ti tension ken nagresulta iti pannakatay ti 51 nga indibidual ken pannakasugat ti sumurok 1,300.
Nadutokan ni Karki kalpasan ti dua nga aldaw a negosasion iti nagbaetan ni Presidente Paudel, Army Chief Ashok Raj Sigdel ken dagiti lider ti tignay protesta.
Kabayatanna, nangiruar ti rakurak ti India, kaparanget a pagilian iti abagatan ti Nepal a mangnamnama ti kinakappia ken kinatibker iti kaparanget a pagilian.
