LAOAG CITY – Inpasigurado ti Philippine National Police (PNP) ti naiget a suportada ken pannakitinnulong iti manarimaan a panangiwayat iti naun-uneg nga inspeksion ti Department of Public Works and Highways (DPWH) kadagiti kangrunaan a proyekto nga adda ti pakainaiganna iti panangkontrol kadagiti panaglayos kadagiti nagduduma a paset ti pagilian.
Daytoy ket maysa a direkta a sungbat iti panawagan nga inrakurak ni Presidente Ferdinand Marcos Jr. nga agpanpanawagan para iti maysa a napudno, naurnos ken awan ti korapsion a pannakaipatungpal kadagiti amin a proyekto imprastraktura ti gobierno.
Inbatad ni Acting Chief Philippine National Police, Police Lieutenant General Jose Melencio Nartatez Jr., dagiti amin nga unit ti pulisia iti intero a pagilian ket nakasagana ken nakaalerto tapno mangipaay ti seguridad ken proteksion idinto a dagiti tauhan ti Department of Public Works and Highways ket aktibo nga agisaysayangkat ti inspeksionda kadagiti nagduduma a flood-mitigation site wenno dagiti lugar no sadinno a maiwaywayat dagiti proyekto tapno makissayan iti epekto ti panaglayos.
Kunana a napateg ti papel ti Philippine National Police iti panangipasigurado ti kinatalged saan laeng iti publiko no diket pakairamanan dagiti nasao a proyekto nga addaan ti dakkel a maitulong kadagiti komunidad iti panangsango ken panangsolbar kadagiti problema ken karit a gapu iti panaglayos.
Mainaig iti daytoy, nangipaayen ti pammilin ni Nartatez kadagiti amin a regional ken lokal nga opisina ti pulisia nga iyalisto a makikoordinar iti Department of Public Works and Highways ken kadagiti lokal a gobierno tapno masigurado ti maysa a naurnos, nakappia ken natalged a panagbisita ken inspeksion kadagiti amin a flood-control site a sakupen ti responsibilidadda.
Kabayatanna, daytoy a pannakibinnulig ket kasapulan tapno maliklikan ti aniaman nga aberya wenno insidente a mabalin a makalapped iti inspeksion.
