LAOAG CITY – Naubor dagiti dua a bus ti Florida a naggapo iti Manila ken Baguio City ken agturong iti probinsya ti Cagayan kabayatan a dumalyasat iti paset ti Barangay Tabug iti ciudad ti Batac.
Basar iti impormasyon, adda dagiti nakalugan ti motorsiklo a nangbakal iti bato a nangitunda iti pannakabuong ti wind shield dagiti bus.
Segun kenni Mr. Willy Florida iti Florida Bus Company, ti Bus 108 a naggapo iti Baguio City ken agturong iti Tuguegarao City ket naubor met iti 2:10 ti parbangon kabayatan a dumaldalyasat iti ciudad ti Batac.
Kalpasan laeng ti 10 a minutos wenno 2:20 ti parbangon ket nabakal met ti bato ti Florida bus GD122 a naggapo iti Manila nga inmaneho ni Jansen Gabriel a residente iti ili ti San Nicolas ken agturong kuma iti Junction Luna Cagayan.
Kalpasan daytoy ket dagus a naglibas dagiti nakamotorsiklo idinto a dagiti dua a driver ket nagsagaba ti kauol ken gasgas iti rupa ken nataming da iti ospital.
Inbatad met ni Police Lt. Gerome Wangkey, ti chief of police ti ciudad ti Batac, manarimaan pay laeng ti imbestigasyon da iti pannakaubor dagiti dua a bus babaen iti panangreview da kadagiti CCTV footages.
