LAOAG CITY – Inawagan ni Senador JV Ejercito a “reboot” ti napasamak a panagsukat iti liderato ti Kamara.
Daytoy ket kalpasan a naglusulos iti puesto ni Leyte Cong. Martin Romualdez ken sinukatan ni Isabela Congressman ken baro nga House Speaker Faustino “Bojie” Dy III.
Inbatad ni Ejercito a kasapulanen ti reboot iti agpada a Senado ken Kamara ken mangnamnama daytoy a makatulong ken makapasayaat ti nagbalin a panagbalbaliw ti liderato.
Kunana nga agpada a nagsukat ti lider ti dua a pagpandayan linteg ti Kongreso ken maibilang daytoy a “fresh start” wenno baro a rugi para iti Senado ken Kamara.
Kabayatanna, nangipadanon ti panangkablaaw ni Senador Chiz Escudero iti baro nga Speaker ken mamati daytoy a mausar ni Dy ti kapadasan ken natibker a panangidaulo tapno bayabayan ti Kamara iti baet kadagiti kritikal nga isyu a sangsangoen ti pagilian.
Nupay kasta, inpetteng ti Senador a saan a nasken nga agbalin a rason ti transition iti panangidaulo tapno malipatan dagiti isyu mainaig kadagiti napalabas a budget ken anomalya kadagiti proyekto imprastruktura.
