LAOAG CITY – Kalikagum ti Sang. Panlungsod ti mangputar ti maysa nga ordinansa para iti panangmandar kadagiti amin a Telecommunications Company a maaddaan ti generator kadagiti pasilidad da.
Segun ken ni Vice Mayor Rey Carlos Farinas, a nagserbi kas author iti nasao nga ordinansa, daytoy ket paset ti panagsagana kadagiti possible a sumangbay a kalamidad ditoy ciudad.
Naipalaon iti nasao nga ordinansa a maibilin kadagiti amin a telecommunications company nga agop-operar iti bisinidad ditoy ciudad a mangimuntar ken maaddaan iti naka-standy a generator.
Inlawlawag ni Fariñas a maysa ti ciudad kadagiti maibilang kas vulnerable kadagiti bagyo rason a napanunutan na daytoy nga addang.
Kunana a mausar dagitoy a generator tapno saan nga agpukaw ti linya ti komunikasyon, nangruna ket nasisita daytoy iti emergency coordination, public advisory, ken kadagiti rescue operations.
Kabayatanna, kuna ti bise mayor a maysa kadagiti nagbalin nga inspirasyon na iti daytoy nga ordinansa ket ti gobernador iti probinsia ti La Union, kalpasan nga inbinglay na kadakuada ti rigat a napasaran da iti naglabas a bagyo.
Kunana a dakkel ti nagbalin a problema iti probinsya ti La Union gapu iti kinaawan ti generator a nangitunda ti panagpukar ti signal ken nagtinnag a kakaasi ti komunikasyon iti nadakamat a lugar.
