LAOAG CITY – Bwineltaan ni Davao City Representative Paolo “Pulong” Duterte ni Majority Leader Sandro Marcos kalpasan a kinondenar na dagiti “Ghost” projects.
Immunan nga inbatad ni Duterte a ti rason no apay a pinili ni Presidente Ferdinand Marcos Jr ni Isabela Rep. Faustino “Bojie” Dy III a nangsukat ken ni dati nga Speaker Martin Romualdez ket tapno kaluban dagiti bulok a sistema gapu iti pannakairamraman ti sumagmamano nga agpanpanday linteg manipod iti kwestyunable a flood control projects.
Naglikudan daytoy ti ub-ubing a Marcos ken inpetteng na a ti kanayun a panaglangan ni Duterte ket saan a maipapaayan ti umiso nga impormasyon ken inakusaran na pay a makumikum daytoy iti panagbirbiruk ti P51-bilyon a balor ti infrastructure projects iti distrito na.
Insungbat met ni Duterte nga arigna bulsek ni Congressman Marcos gapu ta nailawlawagen ti Department of Public Works and Highways (DPWH) Region XI ti P49.8-B a balor ti proyekto.
Nagtalinaed ti takder ni Duterte nga awan ti ghost project iti distrito na.
Kabayatanna, ginutigot ni Duterte ni Rep.Marcos a masapol nga agpa-hair follicle drug test dan iti ama na a ni Presidente Marcos Jr.
