LAOAG CITY – Inpakaammo ni Senador Panfilo Lacson a nangisubmitiren ti kompyuter, dagiti dokumento ken dadduma pay nga ebidensia ni dati a Bulacan assistant district engineer Brice Hernandez tapno paneknekan ti maipagarup a pannakairaman dagiti sumagmamano nga agpanpanday linteg iti maanomalya a flood control project.
Maipalagip a ni Hernandez a naibalud iti Senado ket temporario a pinaruk-atan idi Sabado tapno alaen dagiti ebidensia nga itan ket naka-sealed kabayatan a maiyur-uray ti pormal a pannakatingitingna.
Immunan nga innagan ni Hernandez da Senador Jinggoy Estrada, Senador Joel Villanueva ken dati a Caloocan Rep. Mitch Cajayon-Uy a maipagarup a nabenepisiaran iti kickback banag a naglikudan dagiti maseknan nga opisial.
Kabayatanna, inpetteng ni Lacson a kasapulan nga agpalawag ni resigned Department of Public Works and Highways Secretary Manuel Bonoan no kasano a nai-deliver ti sumurok P600 million manipud iti Syms Construction ken ni Sally Santos iti opisina ti District Engineering Office ti Bulacan.
Binabalawna ti presensia ni Department of Public Works and Highways Undersecretary Roberto Bernardo iti maysa a ladawan kaduana ni Hernandez ken dadduma pay nga engineer ti Bulacan 1st District.
Manamnama a maimbitaran da Bonoan ken Bernardo inton sumaruno a panagdengngeg ti Senate Blue Ribbon Committee inton bigat, Septiembre 22.
