LAOAG CITY – Gutgutiguten ti Sangguniang Panlungsod ditoy ciudad ti Laoag dagiti pasdek negosyo a mangipaay ti diskwento, freebies, ken promo kadagiti mangisursuro ken dadduma a personnel ti pribado ken pampubliko a pagadalan ditoy ciudad.
Daytoy a resolusion ket initiatibo ni Hon. Michael Christophe Agustin, kas paset ti selebrasyon ti World’s Teacher Month.
Segun kenni Agustin, maysa daytoy a wagas a panangipakita ti suporta ken panangaprisyar kadagiti ar-aramiden ken sakripisyo dagiti teaching and non-teaching staff ditoy ciudad.
Inbatadna a dakkel ti papel dagiti mangisursuro iti biag dagiti estudyante babaen iti panangisuro ti naimbag a kababalin ken panangtulong kadagiti agtutubo tapno agbalin to a mangidaulo iti masakbayan.
Daytoy ket nangrugi idi kalman Sep 25, agingga inton October 25 iti agdama a tawen tapno masulit dagiti teaching and non teaching staff ti regalo ti lokal a gobierno ti ciudad kadakuada.
Kabayatanna, kas suporta pay ni Bise Mayor Rey Carlos Fariñas ket mangipaay ti dua pulo a porsyento a diskwento ti Fariñas bus pass kadagiti mangisursuro ken staff ti private ken public schools ditoy ciudad.
