LAOAG CITY – Manamnama a maipatungpal ita a tawen 2025 ti Bamboo Textile Innovation Hub a maiyestablisar iti ciudad ti Batac.
Segun ken ni Mr. Hasler Garalde, Bamboo Focal Person ti gobierno probinsyal, maipatungpal daytoy babaen iti panagkakammayet ti gobierno ti ciudad ti Batac, Department of Science and Technology (DOST) ken ti probinsya.
Inbatadna nga iti agdama ket nakasaganan ti pagyanan ti innovation hub ken maiyur-uray laengen ti makina a mausar iti pannaka-extract ti “fiber” manipud iti kawayan.
Kunana a dakkel a tulong daytoy kadagiti kakailian nangnangruna kadagiti adu ti kawayanna gapu ta mabalin da ton ti aglako ti kawayan iti gobirno probinsyal.
Mainaig iti daytoy. ti klase ti kawayan a mausar ket ti “kawayan tinik” wenno dagiti kaaddoan a kawayan a masarakan ditoy probinsia.
Inlawlawagna a daytoy ti kangrunaan a makagapo nga inyuswat ni Bise Gobernador Matthew Marcos Manotoc bayat a daytoy ti gobernador ti probinsia ti nangpadalus kadagiti kakawayanan iti bukud a lugar ken daytoy met a banag ti naiget a supsuportaran ni Gob. Cecilia Araneta Marcos.
Kabayatanna, inpakaammo ni Garalde nga apaman a maisangpet dagiti masapul a makinaria ket alisto laeng a maisuro ti proseso ti pannakaala ti “fiber” kadagiti kakailian.
Kunana a nangina ti bayad ti kada kilo ti “fiber ti kawayan a mangipasigurado iti dakkel a mapastrek dagiti kakailian.
Mamati ni Garalde nga adu a kakailian ti Ilocos Norte ti mabenipisiaran iti nasao a proyekto.
