LAOAG CITY – Direkta nga innagan ni dati a Senate President Chiz Escudero ni dati nga House Speaker Martin Romualdez nga adda iti likudan ti maanomalya a flood control projects.
Iti manifestation ni Escudero iti plenaryo, innagananna ni Romualdez nga adda iti likudan ti riribuk, panagririri ken panagsisina ti institusion kabayatan nga isalsalakanna ti bagina kadagiti maanomalya a ghost projects.
Dinakamat ti agpanpanday linteg no apay arig nakapokus kadagiti Senador ti isyu ket ti pudno nga adda iti likudan ti maanomalya a flood control projects ket ni Romualdez ngem saan man laeng a napaayaban, naimbestigaran ken napilaan ti kaso.
Inpetteng ni Escudero a namin-adu a daras a dinakamat dagiti nagduduma a resource persons kadagiti imbestigasion ti nagan ni Romualdez ngem arig maipapaigid ti nagan ni Romualdez iti anomalya ti ghost flood control.
Partikular nga inrakurak ni Escudero ti panangdakamat idi ti agasawa a Discaya ken ni dati a Philippine Marines Technical Sergeant Orly Regala Guteza ken ni Romualdez a pammaneknek a karaman daytoy kadagiti substandard ken palpak a proyekto.
Kabayatanna, nakasagana ni Escudero a depensaan ti bagina ken manarimaan ti panangisagsaganana kadagiti kaso kontra kadagiti mangak-akusar ken mangiramraman kenkuana kadagiti malisyoso ken awan ti kinapudnona nga alegasion.
