LAOAG CITY – Pinangtaan ni US President Donald Trump dagiti empledo ti gobierno a mangsupsuporta kadagiti Democrats kabayatan ti government shutdown.
Kuna ti Presidente a dagiti Democratic Senators ti adda iti likudan ti shutdown rason a napateg ti panangipatungpal iti mass layoffs.
Inkalintegan met ni White House Press Secretary Karoline Leavitt ti rakurak ni Trump ken kunana nga addaan ti bileg daytoy a mangkissay iti federal workforce a pakainotan ti gobierno.
Maipalagaip a saan a naipasa ti Senado ti spending bill no sadinno dagiti Democrats ti nanglapped iti inlungalong ni Trump nga Affordable Care Act, a no maipasa ket dagus a mapukawan dagiti 20 a milion a tattao iti healthcare-da.
Tunggal adda shutdown ti gobierno, temporario nga isardeng dagiti federal agencies ti amin a non-essential services.
Agarup 25 a porsiento iti federal workforce ti apektado iti daytoy gapu ta saanda nga agsweldo.
Agtultuloy met ti panagtrabaho dagiti essential workers kas iti pulis, ambulance workers ken air traffic controllers ngem saan a masuelduan dagitoy, ken makaawatda laeng ti back pay no agtutunos dagiti dua a partido iti Kongreso.
