LAOAG CITY – Nagkari dagiti kangrunaan nga ahensya para iti edukasyon iti pagilian a papigsaen ti disaster resilience kadagiti pagadalan iti panangiyuswat da ti kaunaan a Joint National Management Committee (ManCom) meeting.
Gagem ti nasao nga addang a maprotehiran dagiti agad-adal manipod iti pannakalugi da iti panageskwela da iti panawen ti kalamidad.
Inbatad ni Education Secretary Sonny Angara a ti panagtitipon dagiti opisyal ti Department of Education (DepEd), Commission on Higher Education (CHEd), ken ti Technical Education and Skills Development Authority (TESDA) ket gagem na pay a masigurado a nakasagana ti learning delivery para iti panawen ti kalamidad.
Kuna pay ni Angara a ti sesyon iti plenary ket nakasentro iti panangsolbar kadagiti isyu, pannakapapigsa ti public-private partnerships, ken pannakapasayaat ti employability dagiti nagturpos.
Sumuruk-kumurang a 15 a kasosyo iti industriya ti nakipaset iti National Management Committee, no sadinno a naipetteng ditoy no kasano nga ad-adda a maisagana ti pannakitinnulong iti gobierno dagiti agad-adal para kadagiti kasapulan a mangmangged.
Dinakamat pay ti sumagmamano a kasosyon dagiti agdama a proyekto kadagiti pampubliko a pagadalan tapno maipaayan ti gundaway iti pannakapasayaat ti pannakaisagana da para iti mapili da a karera.
Nagpirma met dagiti ahensya ti gobyerno kadagiti katulagan tapno papigsaen ti agtultuloy nga edukasyon, karaman ti maysa a memorandum tapno papigsaen ti technical-vocational track iti babaen ti senior high school.
Napagsasaritaan pay dagiti wagas tapno mapalawa ti access iti babaen dagiti programa nga adda ti pakainaigan iti Pantawid Pamilyang Pilipino Program ken Tertiary Education Subsidy.
Inawagan ni CHED Chairperson Shirley Agrupis ti nasao nga addang kas maysa a milestone para iti trifocalized education system ti pagilian.
Indaulwan met ni TESDA Secretary Kiko Benitez ti apagbiit a panagulimek para kadagiti Pilipino a naapektaran kadagiti naglabas a didigra ken kalamidad, ken inpetteng na a ti kinatalged ket napateg para iti panagdur-as ti tao.
