LAOAG CITY – Mapatta-patta nga umabot iti 25 nga Overseas Filipino Workers (OFW) ti agdama nga adda iti death row iti nagduduma a pagilian.
Daytoy ti kinumpirmaran ni Department of Migrant Workers Secretary Hans Leo Cacdac.
Inrakurak daytoy ni Cacdac kabayatan ti pannakatingiting ti nailungalong a pondo ti Department of Migrant Workers ken attached agencies na para iti 2026.
Segun ken ni Cacdac, bimmaban ti bilang dagiti Overseas Filipino Workers nga adda iti death row, kangrunaan na iti Malaysia, kalpasan nga inpatungpal ti nasao a pagilian ti naluklukay a pagannurutan mainaig iti commutation ti sentensiya.
Innayon ti sekretaryo nga agtultuloy ti ar-aramiden a “behind-the-scenes” ti ahensya babaen ti panagtitinnulong da iti Department of Foreign Affairs (DFA), Office of the President, ken dadduma pay a maseknan nga ahensya tapno maliklikan ti pannakabitay ken masukatan ti nalaglag-an a pannusa dagiti sentensya dagiti Pilipino nga adda iti death row.
Maragsakan met ni Senate Committee on Finance Chairman Senador Sherwin Gatchalian iti panagbaba ti bilang dagiti kadaraan nga adda iti death row ken ginutigot na ti Department of Migrant Workers nga itultuloy ti panangipaay ti legal assistance kadagiti Overseas Filipino Workers a karaman kadagiti kaso iti sabali a pagilian.
