LAOAG CITY – Maisagsaganan ti kaso kontra iti driver ti kotse a nakadinnungpar ti nakamotorsiklo a rason ti pannakatay na iti Paoay- Balacad Road bisinidad ti Brgy. 27 Mumulaan, Paoay Ilocos Norte.
Segun kenni Police Captain Jackson Sugayen, ti chief of police iti ili ti Paoay, ti biktima ket ni Estelyn Bagasol, agtawen ti 49 ken residente iti Brgy. 27 Mumulaan iti ili ti Paoay idinto a ti nakadinnungpar na ket ni Richard Pastor, agtawen ti 44 a residente iti Brgy. Namruangan, Cabugao, Ilocos Sur.
Inlawlawag na a maipila ti kaso babaen iti inquest proceeding ken iyur-uray da dagiti dadduma a dokumento kas iti death certificate.
Inbatad na nga iti imbestigasyon da, agpapaamyanan dagiti dua idi natukbob ti wigo ti motorsiklo a rason ti pannakatulid ti biktima.
Naitaray ti biktima iti Mariano Marcos Memorial Hospital and Medical Center iti ciudad ti Batac ngem naideklara a dead on arrival.
Naamoan a ti biktima ket saan a nakasuot ti helmet idi napasamak ti insidente.
