LAOAG CITY – Pormalen a nagsurat ni Senate President Pro-Tempore Ping Lacson ken ni Senate President Vicente Sotto III tapno ipakaammo ti panagikkatna kas chairman ti Senate Blue Ribbon Committee a mangim-imbestigar iti maanomalya a flood control projects.
Iti surat nga inpatulod ken ni Sotto, inbatad ni Lacson a ti panagikkatna ket gubuay kadagiti alegasion ken pannakadismaya dagiti sumagmamano a padana a Senador iti direksion ti imbestigasion ti komite.
Kunana a dagiti sumagmamano a kakaduana iti Senado ti nangibaga nga arig babbabalawen ti Blue Ribbon Committee dagiti sumagmamano a Senador idinto a maipagarup a protprotektaran met dagiti sumagmamano a miembro ti Kamara a karaman iti kontrobersia iti flood control projects.
Inpettengna a nagtalinaed a patas ken awan ti kankanunongan ti maiwaywayat nga imbestigasion ti komitena ken ti laeng ebidensia ken kinapudno dagiti pangibasaran iti daytoy.
Innayonna nga awan ti pulitikal a konsiderasion dagiti addangna kas mangidaulo ti komite ken awan ti planona nga agpaidasig iti aniaman a posision kalpasan ti terminona inton 2031.
