LAOAG CITY – Inbatad ti Catholic Bishops’ Conference of the Philippines a ti panagbaliw iti liderato ti Senado ket mangdegdeg iti panagdudua iti publiko mainaig iti panangkalob iti imbestigasyon iti kurapsyon iti flood control projects.
Iti maysa nga statement, kuna ni CBCP president Caloocan Bishop Pablo Cardinal David a konkotraen dagiti Obispo ti aniaman a gandat tapno mariribok ti imbestigasyon babaen kadagiti backroom deals, leadership takeovers, wenno selective justice.
Immapela dagitoy kadagiti opisyales ti gobierno a mangisayangkat ti panagdengeg mainaig iti flood control corruption nga addaan ti integridad.
Inlawlawag na a sipsiputan dagiti Pilipino ti mapaspasamak kalpasan ti rebelasyon mainaig iti anomalya a flood control projects ken no agbaliw ti liderato ti Senado iti daytoy a gundaway ket ad-adda nga agdudua ti publiko.
Maipalagip nga agtalek ni Senate President Vicente “Tito” Sotto III nga addaan pay laeng isuna ti suporta babaen kadagiti kakadua na a senador iti baet dagiti reports nga adda ti plano dagiti dadduma a pumanaw iti majority bloc.
