LAOAG CITY – Pormalen a nalukatan ti Bahay Silangan iti Brgy. Tarrag iti ili ti Pagudpud nga inatendaran dagiti nagduduma nga ahensya kas iti Department of the Interior and Local Government, Philippine Drug Enforcement Agency, Philippine National Police, Technical Education and Skills Development Authority, ken iti lokal a gobierno ti Pagudpud
Segun ken ni Philippine Drug Enforcement Agency Regional Director Atty. Benjamin Gaspi, ti reformation center ket agserbi kas balay ti namnama no sadinno maikkan ti maikadua a gundaway dagiti indibidual nga adda ti pakainagan na iti droga .
Kunana a babaen iti daytoy ket makapagbalbaliw dagitoy ken saan dan nga agsubli iti dati nga aramid.
Inlawlawag ni Gaspi a saan a makaanay ti pannakatiliw ken pannakaibalud dagitoy no diket kasapulan ti reformation babaen oti tulong ti bahay silangan a pakaiyuswatan dagiti nagduduma nga aktibidad ken programa.
Mangnamnama met ni Atty. Gerald Gallardo iti Department of the Interior and Local Government a maideklara ti ili ti Pagudpud kas drug-cleared municipality.
Kunana a saan a nalaka a labanan ti iligal a droga ditoy pagilian, ken adu pay dagiti rumbeng nga aramiden babaen iti panagtitinnunos dagiti nagduduma nga ahensia kangruna na iti komunidad.
Mainaig iti daytoy, segun kenni Police Captain Cheryll Cacayorin, iti Ilocos Norte Police Provincial Office ti Balay silangan ket saan laeng a maysa a pasilidad nu di ket pagtaengan a pakaalaan ti namnama ken iti panagbalbaliw.
Nagyaman ni Mayor Rafael Benemerito kadagiti ahensia nga agkaykaysa tapno mapaksiat ti iligal a droga.
Kunana a saan a daytoy ti immuna a pannakainagurar ti balay silangan gapo da addan ti immuna a naipasdek iti asideg ti kabaybayan ngem gapu ta napasaran ti pandemya ket saan a naikaskaso daytoy.
Innayon ti Mayor a ti nasao a pasilidad ket evacuation center ngem gapu mausar laeng no adda ti nakaro a didigra ket napanunutan da a pagbalinen pay daytoy kas reformation center.
Kabayatanna, inpasigurado ni Provincial Director Socorro Galanto ti TESDA nga agtultuloy ti panangsuporta da kadagiti adda iti bahay silangan.
Inbatad na naruay a programa nangruna ti livelihood program ti mabalin a dalanan dagitoy tapno kalpasan ti panagtalinaed da iti balay silangan ket mabalin dan to metten nga iyaplikar dagiti naadal da babaen iti TESDA.
