LAOAG CITY – Naan-anayen a linteg ti gakat a mangipaay ti libre a serbisio iti minatayan para kadagiti marigrigat a pamilia a Pilipino kalpasan a nagbalinen a linteg uray saan a pinirmaan ni Presidente Ferdinand Marcos Jr.
Ti baro a linteg a Republic Act No. 12309 wenno “Free Funeral Services Act,” ket otomatiko a nagbalin nga epektibo idi Setiembre 28, kalpasan ti 30 nga aldaw sipod idi naisubmitir daytoy ti Kongreso iti Malacañang, maiyataday iti Article VI, Section 27(1) ti 1987 Constitution.
Iti babaen ti linteg, ti Department of Social Welfare and Development (DSWD) ti mangidaulo iti panangipaay ti libre a serbisio iti minatayan kadagiti pamilia nga adda iti krisis, pakairamanan dagiti indigent wenno dagiti nakapasar ti kalamidad.
Sakupen met daytoy ti libre a funeral package ti embalsamo, pannakaimansayag, cremation, pannakaitabon, transpiration ken lungon.
Sakbay a maka-avail, kasapulan a mangisubmitir ti pamilia ti death certificate, valid ID, kontrata iti funeral home ken social case study manipud iti Department of Social Welfare and Development social worker.
Mainaig iti daytoy, dagiti karaman a funeral establishments iti programa ket bayadan ti Department of Social Welfare and Development regional offices basar iti naaprobaran a kontrata.
Ti pakpakauna a pundo ket alaen manipud iti P44.75 billion budget ti Assistance to Individuals in Crisis Situations (AICS).
Naammoan a para kadagiti aglabsing, mapatawan ti multa a P400,000 ken pannakakanselar ti lisensia dagiti funeral homes nga aglabsing iti baro a linteg.
Kabayatanna, dagiti matiliwan nga agisubmitir ti peke a dokumento tapno makaala ti libre a serbisio ket maibalud ti innem a bulan ken mamulta ti agingga iti P500,000.
Maipalagip a ti Republic Act No. 12309 ket immuna nga inpasa ti Senado kas Senate Bill No. 2965 idi Hunio 2 ken inadaptar ti Kamara kas House Bill No. 102 idi Hunio 11.
Naipatulod daytoy iti Office of the President idi Agosto 28, ngem saan a pinirmaan ni Marcos Jr. agingga a daytoy ket nagbalin a linteg iti babaen ti panaglabas ti panawen idi Setiembre 28.
