LAOAG CITY – Kinumpirmaran ni Ombudsman Jesus Crispin Remulla nga adda ti 12 agingga iti 15 a Kongresista ti sumango iti kaso iti Sandiganbayan kalpasan a nairaman iti maipagarup nga anomalya kadagiti proyekto imprastraktura ti gobierno.
Inbatad ni Remulla a karaman ditoy dagiti 67 a “congtractors” wenno dagiti kongresista a nagserbi met a kontratista a maysa a panaglabsing iti linteg a mangipawpawil kadagiti opisial ti gobierno a maaddaan ti pinansial nga interes kadagiti kontrata ti gobierno, basar iti Republic Act 3019 wenno Anti-Graft and Corrupt Practices Act.
Inlawlawag ti Ombudsman a dagiti nadakamat nga agpanpanday linteg ket maibilang a “low-lying fruits” wenno dagiti kaso nga alisto a paneknekan ken manamnama a maipilan ti umuna a bansada kadagiti kaso iti Sandiganbayan sakbay nga ag-Nobiembre ita a tawen.
Nadakamat a nangrugi ti imbestigasion iti maipagarup a flood control project anomalies idiay Bulacan kalpasan a nangipila ti reklamo ni Department of Public Works and Highways (DPWH) Secretary Vince Dizon idi Setiembre 11 kontra iti 20 nga opisial ti Department of Public Works and Highways-Bulacan 1st District Engineering Office ken lima a pribado a kontratista.
Karaman kadagiti im-imbestigaran ti Ombudsman ti posible a pannakairaman ni Commission on Audit (COA) Commissioner Mario Lipana kadagiti maipagarup a budget insertion para iti flood control projects no sadinno ti asawana ket maipagarup a nakaala ti sumagmamano a kontrata.
Kuna ni Remulla nga agbalin a napaspas ti taray ti imbestigasion gapu ta addan ti input manipud iti Commission on Audit ken Independent Commission for Infrastructure.
Naikeddeng a makitaripnong isuna ken ni Sandiganbayan Presiding Justice Geraldine Faith Econg tapno pagsaritaan ti panangbukel ti espesyal a dibision a mangiggem kadagiti kaso.
