LAOAG CITY – Nakastreken iti Gaza dagiti dinosdosena nga aid trucks.
Daytoy ket kas paset pay laeng ti nagbalin a katulagan mainaig iti ceasefire deal a nagbalin nga epektibo idi Biernes.
Manamnama nga umadu pay ti bilang dagiti sumrek nga aid trucks idiay Gaza kadagiti sumarsaruno nga aldaw.
Naammoan a makipagpaset ni United Kingdom Prime Minister Keir Starmer ken ni United States President Donald Trump iti international peace summit idiay Egypt inton Lunes.
Mainaig iti daytoy, ti United Kingdom Prime Minister ket maysa kadagiti 20 a dadduma pay a world leaders iti Sharm El-Sheikh no sadinno nga inrakurak ti Egyptian presidency a planoda ti panangpirma ni Trump para iti Gaza deal.
Maipalagip a naikkan ti Hamas agingga iti oras ti alas dose inton Lunes tapno waya-wayaan dagiti amin nga Israeli hostages.
Kabayatanna, manamnama ti panangwaya-waya ti Israel ti 1,700 a balud manipud iti Gaza ken agarup 250 a balud a Palestino.
