LAOAG CITY – Kiniddaw ti Hamas nga iraman iti listaan a waya-wayaan ti Israel dagiti sumagmamano a nalatak a balud pakairamanan da Marwan Barghouti ken Ahmad Saadat kas paset ti ceasefire deal nga agresulta met iti pannakawaya-waya dagiti Israeli hostages.
Napasamak daytoy kalpasan nga inruar ti Israeli Justice Ministry ti listaan ti 250 a balud a Palestino a waya-wayaan ngem saan nga inraman ditoy ti pito kadagiti nalatak a balud.
Basar kadagiti opisial ti Hamas, ti saan a panangiraman kada Barghouti ken Saadat nga agpada a napatawan ti tungpal biag a pannakaibalud gapu kadagiti panangatake a nakatayan dagiti Israeli ket maysa a dakkel nga isyu a mabalin a makaapektar iti taray ti agdama a katulagan.
Basar iti katulagan nga inpila ni United States President Donald Trump, 20 nga Israeli hostages ti manamnama a mawaya-wayaan sakbay nga agpangaldaw inton Lunes, Oktubre 13.
Kagiddan daytoy, waya-wayaan met ti Israel ti 250 a balud a Palestino ken sumurok 1,700 a balud manipud idiay Gaza.
Naminsan nga inpetteng ti opisial ti Palestinian a maipagarup a nagkari ni United States envoy Steve Witkoff a talantanen ken ni Israeli Prime Minister Benjamin Netanyahu ti pannakawaya-waya kadagiti nalatak a balud iti listaan ngem nagkedked ti Israel.
Nadakamat a ni Barghouti ket miembro ti Fatah a maibilang a kalatakan a lider kadagiti Palestino ken posible a makaabak ken ni Mahmoud Abbas wenno asinoman a lider ti Hamas iti eleksion.
Kabayatanna, naammoan a ni Saadat ket lider ti Popular Front for the Liberation of Palestine (PFLP) ket napatawan a maibalud iti uneg ti 30 a tawen gapu iti maipagarup a panangplano dagiti panangraut idiay Israel pakairamanan ti panangpatay iti maysa a nangato nga opisial ti pagilian idi 2001.
