LAOAG CITY – Ginandat ti maysa a lalaki a kettelen ti bukodna a biag iti ili ti Sarrat.
Ti biktima ket agtawen ti 40, construction worker ken residente iti nasao nga ili.
Basar iti imbestigasyon ti Philippine National Police, adda ti saan a nagkinnaawatan ti biktima ken ti asawa na gapu iti maipagarop a third party a nakairamanan ti asawa na.
Naamoan nga iti panagawid ti biktima iti balay da manipod iti inatendaran na a pamunpon ket nangala ti tali ken maipagarop nga inbitin na ti bagina iti maikadwa a kadsaaran ti pagtaengan da.
Nupay kasta, nakita a dagus ti kasinsin na ti nasao a biktima isut gapuna a nagpaarayat kadagiti kabbalay da ken nasalbar da daytoy iti madi a panggepna.
Naitaray ti biktima iti Dingras District Hospital para iti naan-anay a pannakataming na ken iti agdama ket addan iti natalged a kasasaad.
