LAOAG CITY – Inpetteng ni dati nga House Speaker ken Leyte Representative Martin Romualdez a nakasagana daytoy nga ipakita ti Statement of Assets, Liabilities, and Net Worth wenno SALN-na no kasapulan daytoy ti Independent Commission for Infrastructure (ICI) kas paset ti imbestigasionda iti maanomalya a flood-control projects.
Naglikudan ni Romualdez dagiti alegasion a maipagarup nga adda ti mangipatpatulod ti naka-maleta a kuarta iti pagtaenganna kagiddan ti panangipettengna nga awan ti ilemlemmengna ken nakasagana a makitinnulong iti imbestigasion.
Daytoy ti umuna a gundaway a simmango ni Romualdez iti panagdengngeg ti Independent Commission for Infrastructure mainaig kadagiti kuestionable a proyekto ti flood control.
Kabayatanna, inrakurak ni Independent Commission for Infrastructure spokesperson Atty. Brian Keith Hosaka, ti panagsango ni Romualdez ket dakkel nga addang tapno malawlawagan ti papel dagiti agpanpanday linteg iti panangbukel ti pundo para kadagiti nasao a proyekto.
Kunana nga adda dagiti sumagmamano a nagan ti dinakamat ni Romualdez a posible nga imbitaren met ti komision kadagiti sumarsaruno a panagdengngeg.
Inlawlawag ni Hosaka a naglikudan ni Romualdez ti aniaman a pakainaigan kadagiti alegasion a rimmuar kadagiti immuna a panagdengngeg iti Senado ken Kamara.
Malaksid iti daytoy, boluntario a nangisubmitir ni Romualdez ti affidavit iti komision a manarimaan pay laeng a tingtingitingenda isu a manamnama a maminsan manen a paayabanda isuna kadagiti sumarsaruno a panagdengngeg.
