LAOAG CITY – Agar-aramid ti wagas ti White House tapno masigurado a mabayadan dagiti federal law enforcement officer kalpasan ti dua a lawas a government shtudown.
Inbilin ni US President Donald Trump a mabayadan dagiti US military babaen ti pondo a nailatang idi iti Pentagon.
Kinumpirmaran pay ti US Office of Management and Budget ti panagbirbiruk da ti alternatibo a wagas tapno agtultuloy a mabayadan dagiti federal workers.
Malaksid iti military ket karaman pay kadagiti maibilang kas essential workers ket dagiti miyembro ti Federal Bureau of Investigation, Drug Enforcement Agency (DEA), ken ti US Border Patrol and Immigration and Customs Enforcement (ICE).
Ad-adalen payen ti Trump administration ti alternatibo a wagas tapno mabayadan dagiti kangrunaan a programa kas ti food programme para kadagiti babbai ken ubbing.
Maipalagip a napilitan a nag-shutdown ti gobyerno kalpasan a saan a nagkasurutan ti Republicans ken Democrats nga ipasa ti napateg nga spending bill para iti salun-at.
