LAOAG CITY – Indasar ni Konsehal John Michael Fariñas ti maysa nga ordinansa a mangtulong kadagiti ubbing ditoy ciudad ti Laoag a makapasar ti bullying iti ruwar ti pagadalan.
Segun kenkuana, indasar na ti nasao nga ordinansa kalpasan a kinarit ni Mayor James Bryan Alcid ti konseho nga agaramid ti ordinansa a mangprotehir kadagiti ubbing iti ruwar ti pagadalan.
Maipalagip nga immunan nga addan ti pinutar na nga ordinansa nga Anti-bullying act of 2013 a mangsakop kadagiti kaso ti bullying iti uneg ti pagadalan.
Mainaig iti daytoy, inpakaamo ni Fariñas a ti nasao nga ordinansa ket maawagan ti anti- bullying response, assistance and transformative program for childrens wenno anti-brat ordinance.
Inbatad na a babaen iti daytoy nga ordinansa ket adda ti mabukel a reporting desk wenno response desk babaen ti Department of Social Welfare and Development, Commission on Population, Philippine National Police, ken Department of Education no sadinno a dagitoy ti agawat ken agresponde kadagiti report ti bullying ditoy ciudad.
Innayon na a gagem ti nasao nga ordinansa a maprebentar ken mangipaay ti interbensiyon, ngem awan ti maipataw a multa wenno pannusa.
Kabayatanna, nakailanad iti ordinasa nga agkiddaw ti 100 a ribo a pisos kas initial a pondo para iti pannakaimplementar daytoy no maaprobaran.
