LAOAG CITY – Inawagan ni Senador Christopher “Bong” Go a diversionary tactic ti panangipila ti kaso kenkuana ni dati a Senador Antonio Trillanes IV iti Office of the Ombudsman.
Nangipila ti kaso a graft ken plunder ni Trillanes kontra kada Go ken ni dati a Presidente Rodrigo Duterte iti Ombudsman mainaig iti panangpabor ken panangiserrek ti ₱7 billion a government infrastructure projects iti kompania a kukua ti kabsat ken ama ti Senador.
Inbatad ni Go, nalawag a diversionary tactic daytoy nga addang ni Trillanes tapno maiwalin ti atension ti tattao iti pudno nga isyu ti flood control project scandal.
Kunana a biddot ti tao nga ak-akusaran ni Trillanes ken no pudno a seryoso daytoy a labanan ti maanomalya ket nasken a kasoan ti dati nga agpanpanday linteg dagiti pudno a kurakot, dagiti contractors ken financiers daytoy a ti pundo a posible a maus-usar iti propaganda ket mabalin nga aggapu pay kadagiti ghost ken substandard a flood control projects.
Saanen a nasdaaw ti Senador ti panangipila kenkuana ti kaso ni Trillanes gapu ta namin-adun a daras a pinerdian isuna idi iti kapada nga isyu manipud idi 2018, 2021 ken 2024.
Nagpanawagan pay ni Go iti Ombudsman, iti Independent Commission for Infrastructure (ICI) ken iti Department of Public Works and Highways (DPWH) nga agbalin a patas ken ammoen ti kinapudno nangruna iti pudno nga isyu iti gobierno ken iti maanomalya a flood control projects.
