LAOAG CITY – Binabalaw ti Alliance of Concerned Teachers (ACT) ti Department of Public Works and Highways (DPWH) gapu iti kaawan ti addang a mangsolbar iti problema ti kinakurang ti classroom ditoy pagilian.
Segun ken ni ACT Chairperson Ruby Bernardo, saan nga umdas ti target ti Department of Public Works and Highways a 1,700 a classrooms a mangpunno iti 165,000 a panagkurang ti classroom.
Kunana a nakaladladingit gapo ta adu pay laeng kadagiti estudiante ti napusek kadagiti babassit a classrooms no sadinno dagiti daddua ket aggudwa pay ti classroom para iti dua a klase.
Inbatad na a nalawag a dakkel a panagliway daytoy ti Department of Public Works and Highways a mangapektar iti kalidad ti edukasion ditoy pagilian.
Kabayatanna, ginutigot na ni Presidente Ferdinand Marcos Jr. a solbaren na ti nabayagen a parikut ti kinakurang ti classroom iti pagilian.
