LAOAG CITY – Naglikudan ti Philippine Navy nga adda iti kustodyar da ni retired Marine Sgt. Orly Regala Guteza, ti dati a soldado a nagbalin a witness iti Senate Blue Ribbon Committee investigation mainaig iti maipagarop a maanomalya a flood control projects ti gobierno.
Segun ken ni Navy spokesperson Capt. Marissa Martinez, nabayagen a retirado ni Guteza manipod iti Philippine Marine Corps sipud pay idi Hunyo 30, 2020, isut gapuna nga awanen ti koneksyon na iti Philippine Navy.
Inaramid daytoy ti opisyal kalpasan nga inrakurak ni dati a Quezon City Rep. Mike Defensor a ni Guteza ket maipagarop nga adda iti babaen ti proteksyon ti Philippine Marines.
Maipalagip a ni Guteza ket agbalin a kontrobersyal kalpasan nga inbutaktak na iti panagdengngeg iti ssenado a maipagarop a nagikabil ti naruay a maleta a naglaon ti ado a kwarta iti mismo a balay ni dati nga House Speaker Martin Romualdez ken nagkedked a maipaayan ti proteksyon ti Senado, gapu ta inpetteng na a kabaelan na a protehiran ti bagina.
Nupay kasta, rimuar ti panagdudua iti kredibilidd na kalpasan a naglikudan ti maysa nga abogado a pinirmaan na ti affidavit a binasa ni Guteza iti Senado no sadinno a gapu iti daytoy ket saanen a makontak ti dati a soldado.
Mainaig iti daytoy, inbatad pay ni Capt. Martinez a nagtalinaed a propesyonal ken non-partisan ti Philippine Navy, a nakatutuk iti panangipatungpal iti responsibilidad da ditoy pagilian nga addaan ti dayaw ken integridad.
