LAOAG CITY – Maladingitan ni Barangay Chairman David Pascua iti Barangay 23 iti ili ti San Nicolas gapu iti pannakatiliw ti maysa nga SK kagawad iti barangay da gapu iti illegal a droga.
Immuna iti daytoy, natiliw ni SK kagawad Regiemar Pagadan, residente iti Barangay 23 iti ili ti San Nicolas iti naiwayat nga anti-illegal drug buy-bust operation iti Barangay 9 iti nadakamat nga ili.
Naala iti ikotna ti nasurok a maysa a gramo ti maipagarop a shabu nga agbalor ti 34 a ribo a pisos.
Segun ken ni Barangay Chairman Pascua, saanna pulos a ninamnama nga adda ti illegal nga aktibidad ti nasao nga SK kagawad gapu ta aktibo met daytoy kadagiti aktibidad iti barangay.
Kuna na a kanayun na a palpalagipan dagiti opisyal ti barangay ken dagiti barangay tanud a paigetan da ti agmonitor ti aniaman nga illegal nga aktibidad iti barangay da.
Innayon na a gapu iti napasamak ket binilin na manen dagiti opisyal ti barangay a masapol a monitoren da a naimbag dagiti tattao nga agturturong iti barangay da aglalo kadagiti mapagduduwaan ti gargaraw na.
Mainaig iti daytoy, inlawlawag ni SK Kagawad Pagadan nga adda ti katransaksyon na nga agnagan ti Raymund Daoang iti Barangay 9 iti ili ti San Nicolas a daytoy ket barkada na metlaeng no sadinno a gumatang ti shabu nga agbalor ti sangaribo a pisos.
Nupay kasta, kuna na a kabayatan ti panangruruot na iti taltalon iti Barangay 9 iti ili ti San Nicolas ket bigla lattan nga adda ti napan nangkemmeg ken nangposas kenkuana.
Inpetteng ti SK kagawad a saan nga aglaklako ti illegal a droga no di ket gumatang koma laeng ken ni Daoang.
Ni Pagadan ket umuna paylaeng a termino na kas SK Kagawad iti Barangay da.
Iti agdama, nagtalinaed ni Pagadan iti Philippine National Police iti ili ti San Nicolas ken maisagsaganan ti kaso a maipila kontra kenkuana.
Kabayatanna, inbatad ni Police Capt. Sygman Benigno, ti chief of police iti ili ti San Nicolas a natiliw ti SK kagawad kalpasan a naglako ti maysa a sachet a naglaon ti maipagarop a shabu iti police poseur-buyer ken iti panangkapkap da kenkuana ket nakaala da pay ti uppat a sachet naglaon metlaeng ti maatap nga illegal a droga.
Nagkedked met paylaeng a nangipaay ti aniaman a detalye ni Benigno maipanggep iti inbutaktak ni Pagadan a ti kintransaksyon na ket ti agnagan ti Raymund Daoang.
Uray ti pagal-alaan ni Pagadan ti ilaklako na nga illegal a droga ket saan nan nga indetalye pay ngem inbatad na nga adda ti rebelasyon ti SK kagawad kadagiti operatiba da.
