LAOAG CITY – Inlawlawag ni Barangay Kagawad Roger Aquino, Chairman ti Bids and Awards Committee iti Barangay 13 ditoy ciudad ti Laoag a dimmalan iti usto a proseso ti pannakai-award iti contractor ti Concrete Pavement Road iti Sitio 1.
Daytoy ket kalpasan a dimmanon nga impormasyon iti Bombo Radyo Laoag a ti contractor a mangaramid iti proyekto ket maipagarop a personal a pili ni Barangay Chairman Eduardson Santos.
Malaksid iti daytoy, maipagarop pay nga ungungtan ti kapitan ti baro a treasurer no adda ti baro a maki-bid, ken rumrumuar a saan a ma-access dagiti dadduma nga opisyal ti account da iti Philgeps ken ti nakainagan ket ti kapitan ken dati a treasurer.
Segun kenni Aquino, adda dagiti dokumento a mangipaneknek a dimmalan iti usto a proseso daytoy ken ti nangabak ket datin a contractor iti barangay da.
Kunana pay a saan a pudno a maymaysa ti naki-bid gapo ta dua a contractor dagitoy
Saan met a nasungbatan ni Aquino no ti nangabak a contractor ket isu ti personal nga inrefer ni Santos, ken awan ti ammo na no pudno ti alegasyon nga ung-ungtan ti kapitan ti treasurer ngem inadmitir ti kagawad nga awan ti access da iti account da iti Philgeps.
Ummuna iti daytoy, naglikudan ni Kapitan Santos nga inpapilit na a ti napili a contractor iti proyekto ngem indmitir na a karaman kadagiti nag-bid ket ti personal a pinili a contractor nga inrefer ni Sang. Panlungsod Member Respicio ditoy ciudad ti Laoag.
Ti proyekto ket agbalor iti 733 a ribo a pisos ken naggapo iti 20% Development Fund ken masapol a mairugi iti uneg ti 120 nga aldaw.
