LAOAG CITY – Inrekomendar ti Independent Commission for Infrastructure iti Ombudsman a kasoan ti administratibo dagiti karaman iti ghost project iti Riverbank Protection Structure idiay Plaridel, Bulacan.
Karaman kadagiti kalikagum a pilaan ti Independent Commission for Infrastructure ti kaso administratibo da dati a Department of Public Works and Highways (DPWH) Sec. Manuel Bonoan, dati nga Undersecretaries Roberto Bernardo, Maria Catalina Cabral ken walo a dadduma pay.
Iti report ti Independent Commission for Infrastructure, dumanon iti ₱72-M ti ghost flood control project.
Iti interim report ti Independent Commission for Infrastructure, rumrummuar a nalabsing dagiti nadakamat nga indibidual ti grave misconduct, gross dishonesty, conduct prejudicial to the best interest of the service wenno code of conduct and ethical standards for public officials and employees.
Inrekomendar met ti komision a kasoan ti kriminal da dati a Department of Public Works and Highways engineers Henry Alcantara, Brice Hernandez, akinkukua ti Topnotch Catalyst Builders Inc. a ni Eumir Villanueva ken lima a dadduma pay.
Naammoan a dagiti kaso a nairekomendar a maipila kontra kadakuada ket iti panaglabsing ti anti-graft and corrupt practices act, malversation and falsification, presidential decree no. 1759 ken government procurement reform act.
