LAOAG CITY – Aw-awisen ti Public Employment Service Office ditoy probinsya dagiti agbirbirok ti pagtrabahoan a makipagpaset iti Year-End Job Fair.
Inbatad ni Mrs. Liza Atuan, mangidadaulo ti Employment Service Office ditoy probinsya, ti programa a napaulwan Naruay a Panggedan Year-End Job Fair ket maiyuswat intono bigat, Nobiembre 8 iti Mall iti ili ti San Nicolas.
Segun kenni Atuan, kabayatan nga umas-asideg ti paskua ket ado ti paggastosan isut gapo na nga ado met dagiti maididiaya a pagtrabahoan ditoy probinsya.
Kunana nga ado nga oportunidad nga ipaay ti gobierno probinsyal para kadagiti fresh graduate, dagiti kayat da ti sabali a career, ken dagiti mangayat iti baro a pagtrabahoan.
Malaksid iti daytoy ket mabalin da pay a gundawayan dagiti nagduduma a serbisyo ti gobierno kangrunaan na iti Employment Assistance ken ti Skills Development.
Ti programa a Naruay a Panggedan ket naestablisar tapno ad-ado pay a kakailyan ti maikkan ti pagtrabahoan iti probinsya ken saan dan a kasapulan nga agtrabaho iti ballasiw taaw.
Daytoy met ti inyunay-unay ni Gov. Cecilia Araneta Marcos ken Vice Gov. Matthew Marcos Manotoc.
