LAOAG CITY – Indeklarar ni Presidente Ferdinand Marcos Jr. ti maysa a tawen nga State of National Calamity gapu iti Bagyo Tino.
Daytoy ket babaen ti naiparuk-at a Proclamation No. 1077 basar iti panangirekomendar ti National Disaster Risk Reduction and Management Council (NDRRMC).
Nabilin dagiti amin nga ahensia ti gobierno nga itultuloy ti panangipaay ti tulong ken panangipatungpal kadagiti tignay kadagiti nakaro a naapektaran gapu iti kalamidad.
Inmandar ti Presidente kadagiti departments ken agencies a makikoordinar kadagiti local governments ken panangipadanon kadagiti serbisio, equipment ken aid, pakairamanan ti suporta manipud kadagiti pribado a sektor ken international organizations.
Basar iti Office of Civil Defense (OCD), adda ti 224 na indibidual ti nakumpirmaran a natay gapu iti Bagyo Tino idinto a 109 ti nagtalinaed a mapukpukaw.
Mainaig iti daytoy, nakairekord ti Cebu ti kangatoan a bilang dagiti natay nga addaan ti 158 a pimmusay.
Iti Department of Agriculture, mapattapatta nga adda ti ₱159.14 million ti naapektaran iti sumurok lima a ribu a mannalon no sadinno a sumurok 6 a ribu a metriko tonelada ti bagas ken 3,547 nga ektaria ti pagay ti nadadael gapu iti bagyo.
Inrakurak ti Palace Press Officer Undersecretary Atty. Claire Castro a ti Office of the President ket nangiyalokar ti ₱760 million para iti cash assistance para kadagiti local governments gubuay iti Bagyo Tino.
Binilin pay ni Marcos ti Philippine National Police ken Armed Forces of the Philippines tapno mapagtalinaed ti peace and order kadagiti naapektaran a lugar.
Ti state of national calamity ket agtalinaed nga epektibo iti uneg ti maysa a tawen malaksid no ikkaten a nasapsapa ti Presidente.
